Presidenti ukrainas Volodymyr Zelensky ndodhet prej disa orësh në Londër, Britani e Madhe.
Ai u prit në aeroport nga kryeministri britanik Rishi Sunak, ndërsa presidenti ukrainas pritet të vizitojë mbretin Charles dhe t’i drejtohet Parlamentit britanik.
Zelensky do të vizitojë gjithashtu trupat ukrainase që stërviten aktualisht në Britani, në një kohë kur Kievi i bën thirrje Perëndimit që të dërgojë më shumë armë për t’iu kundërvënë forcave ruse.
“Vizita e Presidentit Zelensky në Mbretërinë e Bashkuar është një dëshmi e guximit, vendosmërisë dhe luftës së vendit të tij dhe një dëshmi e miqësisë së pathyeshme midis dy vendeve tona ,” tha Sunak në një deklaratë.
Britania do të njoftojë gjithashtu sanksione të mëtejshme, që do të synojnë ata që kanë ndihmuar presidentin rus Vladimir Putin “të grumbullojë pasurinë e tij personale dhe kompanitë që përfitojnë nga makina e luftës e Kremlinit”.
