President serb Aleksander Vuçiç ka thënë se Serbia i ka zbatuar të gjitha detyrimet ndërkombëtare nga Marrëveshja e Brukselit.
“Ne sillemi 100 për qind në përputhje me Marrëveshjen e Kumanovës dhe në përputhje me Rezolutën 1244.
Ne nuk kemi dërguar ushtarë në Kosovë dhe as nuk kemi shkelur ndonjë marrëveshje. Ne jemi të rreptë në këtë çështje dhe kemi biseda të mira me ushtarët e KFOR-it gjatë gjithë kohës”, u shpreh Vuçiç për CNN.
Ai tha se Kosova nuk ka bërë të mundur krijimin e Asociacionit të Komunave me Shumicë Serbe.
“Vetëm dy gjëra janë të rëndësishme. I ftuari juaj (Albin Kurti) foli për faktin se ajo që ishte rënë dakord nuk u zbatua. Beogradi zbatoi gjithçka. Dhe një gjë duhet të bëjë Prishtina, të formojë Asociacionin e Komunave me Shumicë Serbe.
Nuk e kanë bërë deri tani dhe nuk do ta bëjnë”, deklaroi Vuçiç Presidenti serb shtoi se që nga ardhja në pushtet e Albin Kurtit, janë regjistruar 353 sulme etnike ndaj serbëve. “Vetëm këtë vit ka pasur pesë të shtëna kundër civilëve të kombësisë serbe. Serbët duan vetëm siguri dhe siguri për veten dhe familjet e tyre”, u shpreh Aleksander Vuçiç.