Partia Demokratike, ka vijuar edhe sot me akuza ndaj funksionarëve dhe deputetëve të maxhorancës. Deputetja Albana Vokshi ka denoncuar publikisht deputetin e LSI-së në Korçë Piro Kapuranin. Vokshi ka deklaruar se qeveria vazhdon të arrestojë dhe të lërë në errësirë qytetarët e pamundur dhe nga ana tjetër të favorizoj njerëzit e fuqishëm dhe që janë pranë tij dhe maxhorancës.
“Partia Demokratike denoncon pabarazinë para ligjit që ka krijuar Edi Rama. Qytetarët e pamundur janë në errësirë ose në burg për dhjetë mijë lekë të vjetra, deputeti biznesmen, Pirro Kapurani, pronar i fabrikës së tjegullave dhe tullave, nuk preket edhe pse ka 205 milionë lekë detyrime ndaj shtetit.Shiheni këtë faturën e energjisë. Subjekti në fjalë ka 205 milionë lekë detyrime ndaj shtetit. Cfarë ka ndodhur me pronarët? A janë përballur ata me ligjin? A u është ndërprerë energjia?”, ka deklaruar deputetja Albana Vokshi.
Vokshi ka vijuar më tej kur thotë se mbi Kapuranin dhe biznesin e tij nuk është marrë asnjë masë dhe kjo per faktin e thjeshtë se është miku i Ramës dhe i Ilir Metës. Ajo ka akuzuar Ramën se është nxitësi kryesor i pabarazisë përpara ligjit dhe e ka kërcënuar atë me protesta popullore kundër pabarazisë.
“ Pabarazia parpara ligjit është skandaloze dhe mban firmën e Edi Ramës. Kjo pabarazi përpara ligjit ka bërë që qyetarët të jenë sot në këmbë. Dhe kjo pabarazi, kjo padrejtësi, kjo e keqe do të ndalet. Populli do të jetë më i bashkuar se kurrë, në protestat më të mëdha që ka parë ndonjëherë vendi”, ka përfunduar Vokshi.
