Presidentja Vjosa Osmani është shprehur se ka pasur takime të vazhdueshme me kryeministrin Albin Kurti, për takimin e javës së kaluar në Ohër, për normalizimin e marrëdhënieve me Serbinë.
Sipas saj, Kurtit i janë propozuar dokumente të tmerrshme dhe ka bërë mirë që nuk i ka pranuar.
“Me kryeministrin jemi takuar siç takohemi gjithnjë, edhe para takimit të kryeministrit në Bruksel edhe pas kthimit jemi takuar dhe kemi diskutuar në detaje para se të shkoj në Ohër. Jemi konsultuar edhe gjatë takimeve në Ohër, dhe jemi takuar edhe pasi ka përfunduar dakordimi në Ohër ku jemi njoftuar në detaje jo vetëm për dokumentet dhe versionet e ndryshme që kanë qenë para kryeministrit dhe delegacionit të Kosovës…
Më duhet të them se këto janë versione të tmerrshme të cilat Republika e Kosovës ka bërë mirë që nuk i ka pranuar pavarësisht presioneve jashtëzakonisht të padrejta që e kanë trajtuar Kosovën në mënyrë shumë të pabarabartë në raport me palën tjetër”, është shprehur presidentja e Kosovës.
Vjosa Osmani shtoi se për të janë të papranueshme iniciativat e tilla nga faktori ndërkombëtar.
“Nganjëherë për mua si presidente është vështirë të besoj që dikush nga komuniteti ndërkombëtar e merr një iniciativë të tillë që të propozoj gjëra të tilla që e vendos vetëm njërën palë në një pozitë kaq të pabarabartë”, është shprehur Vjosa Osmani, presidente e Kosovës.
