Presidentja e Kosovës Vjosa Osmani ka përkujtuar ditën e sotme 24-vjetorin e masakrave të kryera nga regjimi serb në Brestoc të Rahovecit, ku u vranë 49 civilë, atë në Celinë ku u vranë 75 civilë dhe masakrën në Fortesë ku humbën jetën 68 civilë.
Ajo thotë se nuk mund të ketë stabilitet dhe paqe, për sa kohë që nuk është vendosur drejtësi, lidhur me krimet e kryera nga Serbia në Kosovë.
“Sot bëhen 24-vjet që kur forcat e regjimit gjenocidal të Serbisë vranë 75 civilë në Celinë, 68 në Fortesë dhe 49 në Brestoc të Rahovecit.Në këtë ditë në mbrojtje të popullsisë civile, ranë edhe pesë dëshmorë të UÇK-së.
Në këtë përvjetor, e kujtojmë secilin civil që ra për lirinë e vendit dhe të gjithë dëshmorët e UÇK-së që e bën të mundshme lirinë tonë.Nuk mund të ketë paqe e stabilitet pa drejtësi për krimet që ka bërë Serbia kudo në Kosovë.Sjellja e kriminelëve para drejtësisë është përpjekje e jona e çdoditshme.Qoftë i përhershëm kujtimi për civilët dhe dëshmorët!”, ka thënë Osmani.