Përveç akuzave të para, për të dyshuarit në vjedhjen e 713 milionë lekëve në Departamentin e Emisionit të Bankës së Shqipërisë kërkohet kthimi i parave. Banka e Shqipërisë ka përgatitur dosjen për ta dorëzuar në Gjykatën e Tiranës, ku do t’u kërkojë punonjësve të arrestuar, 713 milionë lekët e vjedhura.
Dosja është përgatititur nga Avokatura e Shtetit dhe duket se të arrestuarit do të kthehen edhe në debitorë, bën me dije Gazeta Shqiptare.
Kërkesa është shpërblim dëmi dhe do të rëndojë mbi të gjithë ata punonjës që do të shpallen fajtorë.
Skandali i vjedhjes së 713 milionë lekëve u zbulua në 21 korrik të vitit të kaluar. U arrestua asokohe edhe Guvernatori I Bankës së Shqipërisë Ardian Fullani, I cili tashmë është nën akuzë por në gjendje të lirë.
Vala e arrestimeve kapi 17 zyrtarë, ndër të cilët edhe Elivar Golemin, ish-inspektore e Përgjithshme. Mes tyre janë: Dorian Çollaku, Liljana Tusha, Lavdim Cani, Myzejen Belba, Dhimitër Davidi, Bashkim Xhilaga, Fatbardha Gurthi, Bahri Allushi, Gentian Jahja, Mehdi Marku, Emiljano Lamçe, Mehdi Molla, Ilir Dedja, Petrit Ramohitaj si dhe Ardian Bitraj dhe Mimoza Bruzia.