Burime diplomatike nga Athina pohuan për Top Channel se ka bisedime me Shqipërinë për kalimin e 10 mijë refugjatëve sirianë.
Korrespondenti i Top Channel në Athinë, Artur Bibe konfirmoi këtë në një lidhje të drejtpërdrejtë me Top Story-n. Thuhet se bisedimet janë në fazë fillestare.
Nisjen e këtyre bisedimeve e ka konfirmuar edhe zv.ministrja e Brendshme, e pranishme në panel, Elona Gjebrea.
“Nuk ka marrëveshje me Greqinë për refugjatët, por ka bisedime dhe zgjidhja do të jetë në kuadrin europian”, tha Gjebrea.
Ky informacion dhe bisedimet e konfirmuara nga Gjebrea, rrëzojnë edhe njëherë tjetër deklaratat e kryeministrit Edi Rama se Shqipëria nuk do të hapë kufijtë për refugjatët e Lindjes së Mesme. Ishte ministrja e Integrimit, Klajda Gjosha ajo që bëri fillimisht një deklaratë të kundërt nga Rama, duke theksuar se vendi ynë po përgatitej për refugjatët që mund të vijnë nga Greqia.