Ministri i Jashtëm rus Sergei Lavrov ngriti sot dyshime mbi legjitimitetin e procesit të ndryshimit të emrit të Maqedonisë.
“Kur emri miratohet me anë të një dokumenti, që për shembull, nuk është nënshkruar në nivelin që përcakton kushtetuta e Maqedonisë – kjo ngre pikëpyetjet mbi legjitimitetin e procesit”, tha ai në Moskë.
Parlamenti i Maqedonisë miratoi të premten një sërë amendamentesh kushtetuese për të ndryshuar emrin në Republika e Maqedonisë së Veriut, në bazë të një marrëveshje me Greqinë që synon t’i japë fund mosmarrëveshjes 27 vjeçare mes dy vendeve fqinje. Zgjidhja e çështjes së emrit i hap dritën jeshile anëtarësimit të Maqedonisë në NATO dhe në Bashkimin Evropian./VOA