Martin Bardhi është vrarë në ambientet e lokalit të tij, në mes të qytetit të Rrëshenit. Në tavolinë bashkë me të, në momentin e atentatit kanë qenë dhe shtetasit Ilir Bardhoku, Olti Gjini dhe Indrit Bardhi, të cilët kanë mbetur të plagosur.
Forca të shumta policie kanë rrethuar zonën dhe në ndihmë të Policisë lokale, janë nisur Forcat Speciale “RENEA” dhe FNSH, si dhe janë ngritur pika kontrolli në Rrugën e Kombit, në drejtim të Kukësit, të Laçit, Lezhës dhe Dibrës.
Lexo edhe: Tentoi të vriste nipin e Kastriot Reçit, kush është i ekzekutuari në Rrëshen
Ndërkohë, në fshatin Gëziq, Mirditë, është konstatuar duke u djegur një automjet tip fuoristradë, që dyshohet se është përdorur nga autorët.
Gjithashtu, drejt vendit të ngjarjes janë nisur Zv/drejtori i Përgjithshëm i Policisë së Shtetit dhe drejtorët e departamenteve të Policisë Kriminale, si dhe të Rendit dhe Sigurisë Publike. Drejtori i Policisë së Lezhës, Alfred Elezi është shprehur se të plagosurit kanë qenë në lokalin e Martin Bardhit.
“Në lokalin e tij është vrarë me armë shtetasi Martin Bardhi. Janë plagosur dhe tre personat që ishin në tavolinë me të. Autorët janë larguar me fuoristradë dhe në fshatin Gëziq është gjetur një makinë e djegur. Dihen konfliktet që ka pasur fisi Bardhi me fiset e tjera”, u shpreh Elezi.
Për zbardhjen e kësaj ngjarjeje është ngritur një grup i posaçëm hetimor, me specialistë nga Departamenti i Policisë Kriminale në DPPSH dhe nga Policia vendore, dhe në drejtimin e prokurorit, vijon puna intensive për identifikimin dhe kapjen e autorëve.
Ngjarja e rëndë ka tronditur banorët e zonës, kalimtarët dhe nxënësit e shkollës që ndodhet në qendër të qytetit. Sipas tyre, autorët kanë qëlluar me breshëri kallashnikovi për rreth 5 minuta, duke mos marrë parasysh numrin e viktimave.
Tre personat e plagosur që ndodheshin në tavolinë me Martin Bardhin, Ilir Bardhoku, Olti Gjini dhe Indrit Bardhi, janë sjell në Spitalin e Traumës në Tiranë, për mjekim të specializuar. Njëri prej tyre mësohet se është në gjendje kriktike.
// Newsbomb.al
