Kryeministri Edi Rama ka folur për televizionin publik bullgar “BNT”, ku ka prekur një sërë temash.
Një nga temat për të cilat kreu i qeverisë shqiptare foli ishte anëtarësimi i Shqipërisë dhe Maqedonisë në Bashkimin Europian.
Duke zbutur kritikat e tij për Bullgarinë që muaj më parë e kritikoi për bllokimin që po i bënte Maqedonisë së Veriut në rrugën drejt hapjes së negociatave, ai tha se reagimi ndaj Bullgarisë para disa muajsh nuk ka lidhje me marrëdhëniet mes dy vendeve dhe të shkuarës së tyre.
“Sigurisht që nuk kam harruar që kemi pasur një moment debati. Por ishte një rast shumë specifik në një kohë shumë specifike. Ai nuk kishte asnjë lidhje me rrënjët, me thellësinë e marrëdhënies sonë” tha Rama.
Më tej Rama tha se Shqipëria dhe Maqedonia e Veriut nuk duhet të trajtohen si paketë në rrugën e tyre drejt Bashkimi Europian. Sipas tij që nga momenti kur një vend fillon negociatat e anëtarësimit, rruga e tij varet nga meritat e tij, jo nga politika apo gjeopolitika.
“Por në atë kohë, siç e mbani mend, të ndahesh nuk ishte një opsion. Sepse nuk vendosëm ne, por Këshilli Evropian. Kjo e bëri situatën tonë mjaft alarmante dhe pozicionin tonë mjaft të vështirë. Sot, mendoj se rrugët tona u ndanë natyrshëm. Sepse që nga momenti kur një vend fillon negociatat e anëtarësimit, rruga e tij varet nga meritat e tij, jo nga politika apo gjeopolitika. Të paktën, kështu është në libër. Epo, ne e dimë se ndonjëherë dhe gjithnjë e më shumë ajo që shkruhet në një libër nuk ndodh në realitet. Por nuk shoh asnjë arsye që ne të mbahemi më bashkë. Secili ka mënyrën e vet, shtoi Rama.