Newsbomb.al mëson se Prokuroria e Lushnjes dhe Shërbimi për Çështjet e Brendshme dhe Ankesat, ka marrë në dorë ngjarjen e ndodhur mesditën e sotme në Divjakë. Aktivistja e PD Elsa Bita pretendon se shefi i Komisariatit i ka thyer krahun se po filmonte takimin e PS-së.
E kontaktuar nga redaksia jonë, Policia e Fierit ka bërë me dije se Prokuroria ka nisur hetimet për pretendimet e qytetares së dhunuar, e cila ka mbërritur në spital me dorë të thyer. Ndërkohë, SHÇBA-ja ka nisur hetimet për shefin e Komisariatit Altin Shehu.
Për këtë ngjarje, ka reaguar më herët dhe kreu i PD Lushnje Saimir Korreshi, i cili ka kërkuar që ngjarja të hetohet sa më parë pasi Policia, sipas tij, është vënë në dispozicion të Erion Braçes.
“S’po bëja asgjë. Thjesht po filmoja. Isha drejtëpërdrejtë dhe po bënim miting brenda në lokal. Njoftuan policinë. Erdhi shefi dhe më goditi vetë Më mori telefonin, më tërhiqte me forcë,” ka thënë aktivistja e PD.