Ekipet e shpëtimit në Indi po përpiqen të gjejnë të mbijetuar pas një përplasjeje të tmerrshme që përfshiu tre trena mbrëmjen e djeshme, duke vrarë qindra njerëz në një nga katastrofat më të rënda hekurudhore që vendi ka parë ndonjëherë.
Të paktën 288 persona janë konfirmuar të vdekur dhe më shumë se 1000 të plagosur pas përplasjes mes dy trenave të pasagjerëve dhe një treni mallrash në qytetin Balasore, në shtetin lindor të Odisha.
Por ekipet e shpëtimit thonë se numri i të vdekurve mund të rritet më tej, pasi shumë njerëz mendohet se janë bllokuar nën vagonët e përmbysur.
Shkaku i përplasjes mbetet i paqartë, por ministri indian i hekurudhave Ashwini Vaishnaw u tha gazetarëve të shtunën se një “hetim i nivelit të lartë” është urdhëruar për përplasjen, e cila ndodhi në Odisha verilindore, pranë stacionit hekurudhor Bahanaga.
Më shumë se 115 ambulanca dhe disa njësi të shërbimit zjarrfikës janë përfshirë në përpjekjen e shpëtimit. Ushtria indiane, ekipe nga Forca Kombëtare e Reagimit ndaj Fatkeqësive, Forca e Veprimit të Shpejtë të Fatkeqësive Odisha dhe shërbimet e zjarrit të shtetit janë dërguar në vend.
Qindra njerëz janë mbledhur jashtë spitaleve lokale për të dhuruar gjak, në një shfaqje masive solidariteti dhe mbështetjeje. Rreth 500 njësi gjaku u mblodhën gjatë natës me 900 njësi aktualisht në magazinë.
Incidenti ka bërë jehonë në të gjithë Indinë, një komb prej 1.4 miliardë banorësh, duke nxitur thirrje të reja për autoritetet për të adresuar çështjet e sigurisë që kanë pllakosur hekurudhat e vendit për dekada.
Trenat e Indisë u shërbejnë 13 milionë pasagjerëve çdo ditë, dhe ndërsa qeveria ka investuar së fundmi miliona për të përmirësuar hekurudhat e saj, vitet e neglizhencës kanë bërë që binarët të përkeqësohen.