Skocia ka regjistruar rastin e parë të lisë së majmunit në vend, në një kohë kur ky virus po përhapet në shumë shtete.
Shëndeti Publik i Skocisë tha se pacienti po trajtohej në përputhje me protokollet dhe udhëzimet e miratuara në nivel kombëtar dhe se gjurmimi i kontaktit ishte duke u zhvilluar.
Dr Nick Phin, drejtor i shkencës së shëndetit publik dhe drejtor mjekësor në agjenci, tha se rreziku për publikun ishte i ulët, por i kërkoi kujtdo që ka skuqje të pazakonta të ngjashme me flluska ose plagë në trupin e tyre të shmangë kontaktin e ngushtë me të tjerët dhe të kërkojë këshilla mjekësore.
“Ne kemi procedura të vendosura mirë dhe të fuqishme të kontrollit të infeksionit për trajtimin e rasteve të tilla të sëmundjeve infektive dhe këto do të ndiqen në mënyrë rigoroze. Ne po punojmë me bordet dhe partnerë më të gjerë në Skoci dhe MB për të hetuar burimin e këtij infeksioni” tha Phin.
Pak ditë më parë edhe Italia konfirmoi rastin e parë të lisë së majmunit. Lija e majmunit transmetohet te njerëzit nëpërmjet kontaktit të ngushtë me person ose kafshë të infektuar, ose me material të kontaminuar me virusin.
Njerëzit që infektohen nga lija e majmunit mund të përjetojnë ethe ose temperaturë të lartë, dhimbje koke, muskujsh dhe shpine, ënjtje të nyjeve limfatike, të dridhura dhe rraskapitje. Një skuqje e ngjashme me flluska ose një numër i vogël i plagëve të ngjashme me flluska mund të zhvillohen, duke filluar në fytyrë dhe më pas duke u përhapur në të gjithë trupin, duke përfshirë në zonën gjenitale.
