Kryetarja e LSI-Monika Kryemadhi ka deklaruar se operacioni ‘Plumbi i Artë’ ka dështuar në kapjen e personave në kërkim.
Në një intervistë televizive, deputetja ka folur edhe për Presidentin e ri, teksa thotë se debatet janë krijuar për të larguar vëmendjen nga zhvillimet e fundit që po ndodhin me dëshmitë e dy të penduarve, që përfshijnë shumë grupe kriminale.
Sipas Kryemadhit, dëshmitë e dy vrasësve përfshijnë shumë grupe kriminale, pjesa më e madhe e të cilave ka qenë pjesë e garnizonit ushtarak të mazhorancës në zgjedhjet parlamentare të 25 prillit.
“Dështimi i operacionit ‘Plumbi i Artë’ siç ndodhi dekonspirimi i të gjithë operacionit tregoi se rrjedhja e informacionit nga do të vijë, do të vijë nga policia nuk besoj që ka ndonjë prokuror që do të dëmtojë procesin e tij. Situata me presidentin është krijuar dhe për të larguar vëmendjen nga zhvillimet e fundit që po ndodhin me dëshmitë e dy të penduarve, që përfshijnë shumë grupe kriminale, pjesa më e madhe e të cilave kanë qenë të përfshirë drejtpërdrejt në zgjedhjet e 25 prillit, ku kanë qenë garnizoni ushtarak i Partisë Socialiste në këto zgjedhje. Gjithashtu po kërkohet të largohet vëmendja dhe nga çështja e inceneratorëve, e cila është një arsye edhe më e rëndë që implikon kryeministrin, kryetarin e bashkisë, ministra”, ka thënë Kryemadhi.
