Fitorja e parë për Tiranën në vitin 2015 ka ardhur nga një ndeshje mjaft e mirë e Selemani Ndikumana.
Sulmuesi i kombëtares së Burundit ishte autor i dy golave në sfidën që bardheblutë zhvilluan ndaj Apolonisë, 90 minutësh i luajtur në “Niko Dovana” të Durrësit pasi stadium “Selman Stërmasi” është në rikonstruksion.
Bardheblutë e drejtuar nga Gugash Magani ishin dominues dhe falë blerjeve të reja, kishin supremacinë ndaj myzeqarëve. Goli i parë i Ndikumanës erdhi pak para se skuadrat të shkonin në pushimin mes pjesëve pas një goditje të bukur të afrikanit në portën e Cetkoviç.
Tirana konkretizoi dominimin me golin e dytë në minutën e 64 me të njëjtin autor. Pas rasteve nga Muzaka dhe Morina, ishte Ndikumana që siguroi 3 pikët, këtë herë duke shmangur dhe portierin e Apolonisë.
Ndeshja tjetër Flamurtari-Teuta përfundoi 2-1 për ekipin vlonjat që me këtë fitore të rendësishme ngjitet në kuotën e 25 pikëve, ndërkohë që durrsakët mbeten sërish 16 pikë. Derbi i bregdetit u ndez me golin e parë të Abilaliajt i cili nuk e pati aspak të vështirë ta shtyjë sferën drejt rrjetës në rrjedhimet e një goditje dënimi.
Por Teuta barazoi me sulmuesin librazhdas Mirel Çota ende pa kaluar gjysmë ore lojë. Goli i fitores për Dlamurtarin erdhi “in extremis” nga Shehaj, atëherë kur askush te vlonjatët nuk shpresonte.
Kukësi u konfirmua pretendent për titullin, këtë herë në “Loro Boriçi”. Verilindorët fituan 2-1 në fushën e Vllaznisë falë golave të Pero Pejic në minutën e 5 dhe të Lushtakut në të 59′. Për Vllazninë shënoi Kalaja 65′.
TIRANA – APOLONIA 2-0
VLLAZNIA – KUKESI 1-2
FLAMURTARI – TEUTA 2-1