NATO ka reaguar ndaj sulmeve dhe plagosjes së trupave të KFOR në Veri të Kosovës, si pasojë e përleshjes me protestuestuesit serbë.
Përmes një komunikimi me mediat, Aleanca Veri-Atlantike ka dënuar sulmet e paprovokuara kundër trupave të KFOR duke thënë se janë të papranueshme dhe duhet të ndalen menjëherë.
Ata shtuan se KFOR do të marrë të gjitha masat e duhura për të ruajtur një mjedis të sigurt dhe do veprojë duke mos mbajtur anën e asnjërës palë.
“NATO dënon fuqishëm sulmet e paprovokuara kundër trupave të KFOR-it në veri të Kosovës, të cilat kanë çuar në plagosjen e një numri prej tyre. Sulme të tilla janë krejtësisht të papranueshme. Dhuna duhet të ndalet menjëherë”, thuhet në reagimin e NATO-s.
KFOR-i do të ndërmarrë të gjitha veprimet e nevojshme për të ruajtur një mjedis të sigurt dhe do të vazhdojë të veprojë në mënyrë të paanshme, në përputhje me mandatin e tij sipas Rezolutës 1244 të Këshillit të Sigurimit të Kombeve të Bashkuara të vitit 1999”, tha zëdhënsja e NATO-s, Oana Lungescu
Ndërkohë, më shumë se 53 persona janë plagosur ditën e sotme nga protesta në Veri të Kosovës.
Të plagosurit janë qytetarë serbë, një gazetar po nga Serbia dhe disa ushtarë të KFOR-it, të cilët ndodhen në Qendrën Mjekësore në Zveçan dhe po marrin trajtime nga mjekët.