Michael Granoff, kreu i Fondacionit Shqiptaro-Amerikan për Zhvillim (AADF), është nderuar me medaljen e Mirënjohjes së Qytetit. Ai falënderoi Bashkinë e Tiranës dhe siguroi se shumë punë të mira do bëhen edhe në të ardhmen.
“Për mua çdo gjë është për të ardhmen: zgjedhjet janë për të ardhmen, njerëzit mendojnë për jetën dhe gjithmonë mendojnë për të ardhmen e jetës së tyre.
Edhe ne duhet të mendojmë për gjërat që kemi bërë dhe shpresoj që ajo që do të kemi mundësi t’i zgjerojmë ato, t’i bëjmë edhe më mirë, por gjithashtu të flasim edhe për gjerat e së ardhmes, se çfarë mund të bëjmë tjetër, si të realizojmë punë që të tjerët nuk i bëjnë dot”, tha Granoff.
Falë mbështetjes së Fondit Shqiptaro – Amerikan për Zhvillim në Shqipëri janë realizuar një sërë projektesh të rëndësishme, si transformimi i Pazarit të Ri, Piramidës, hapja e qëndrës TUMO, Akademisë së Zhvillimit të Softuerit nga Protik Center, ElementIT project, Crimson Finance Fund Albania dhe programi i bursave LEAD Albania.
