Mediat e rëndësishme ndërkombëtare kanë raportuar shkarkimin e Shkëlqim Canit nga posti i ministrit të Financave.
The Associated Press shkruan se shkak kryesor në këtë vendim të kryeministrit Edi Rama mund të jetë rritja e borxhit publik nga 62% në vitin 2013 në 73% aktualisht. AP shprehet se asnjë arsye zyrtare nuk është dhënë nga qeveria për këtë lëvizje.
Për Reuters, Cani arriti të stabilizonte financat e vendit por dështoi në përmbushjen e objektivit për mbledhjen e taksave.
Edhe për faqen e specializuar të ekonomisë “Bne IntelliNews”, shkak për shkarkimin e Canit ka qenë performanca e ulët në mbledhjen e taksave, ndërsa theskon se vendimi është marrë pas presionit të madh të ushtruar nga FMN.
Shkëlqim Cani do të zëvendësohet në këtë post nga Arben Ahmetaj, që deri më tani mbante postin e ministrit të Zhvillimit Urban, ministri e cila do të kalojë nën drejtimin e Milva Ekonomit.