Kryeministri i Kosovës Albin Kurti ka dhënë një deklaratë të shkurtër për media pas takimit me presidentin serb Aleksandër Vuçiç, duke fajësuar kreun e diplomacisë së BE-së Joseph Borell, i cili ishte gjithashtu i pranishëm në takim.
Kurti tha se mosarritja e marrëveshjes me Serbinë, këtë të hënë, vjen si pasojë e heqjes dorë nga Borell, prej propozimit të bërë nga vetë Bashkimi Europian.
“Në propozimin që na kanë sjellë ne ka qenë edhe afati, marsi i vitit 2023. Ne po vijmë këtu për t’u marrë vesh për marrëveshje që arrihet para marsit. Borell hoqi dorë nga ky afat me keqardhje mund ta them, dhe nga propozimi i BE-së, po them me keqardhje sepse vetë e kanë propozuar marsin e vitit 2023 dhe gjithashtu propozimi është i BE-së”.
Kurti tregoi edhe se çfarë i tha Borell për propozimin gjatë takimin që pati me të në Paris.
“Kur u takuam në Paris, Borell tha se propozimi nuk është franko-gjerman, por i BE-së. Në rregull pra, por sot ai hoqi dorë nga propozimi i BE-së. Unë jam i gatshëm që të vij këtu, të zhvilloj takime, gjithmonë me strukturën dhe rendin e njëjtë. Marrëveshja finale dhe çështje aktuale edhe si puna e këtyre targave, por nuk bën njëra pa tjetrën”.