Një britanik është goditur me thikë për vdekje në Portugali, teksa po luante lojën e vetëvrasjes së balenës blu.
Viktima 35-vjeçare, emri i të cilit nuk bëhet i ditur, dyshohet se u sulmua pasi shpërtheu një sherr mes një grupi miqsh, ndërsa ata luanin sfidën në internet, e cila është lidhur me një sërë vdekjesh në mbarë botën.
Loja, që synon kryesisht adoleshentët, nis me një grup njerëzish të cilët kanë detyra të caktuara nga një ‘administrator’, por që situatat përkeqësohen gradualisht dhe përfundojnë në dëmtim të vetvetes. Policia gjeti trupin e viktimës të dielën në një pyll të largët midis lokaliteteve Poco Negro dhe Soalheira, pranë qytetit qendror të Pedrogao Grande.
Një 26-vjeçar britanik mësohet se është dorëzuar në polici dhe ka pranuar krimin. Sipas raportimeve, policia të dielën mori në pyetje të paktën 5 persona, duke përfshirë edhe 26-vjeçarin. Gjithçka nisi pas një feste private, teksa në mes të natës ata shkuan në një zonë të izoluar pyjore për të filluar lojën.
‘Sfida e Balenës Blu’ disa vite më parë u kthye në një problem të madh, pasi inkurajonte adoleshentët të marrnin pjesë në një seri prej 50 sfidash që kulmojnë në kryerjen e vetëvrasjes.
Në vitin 2016, një rus Philipp Budeikin, atëherë 21 vjeç, pretendoi se e kishte shpikur lojën. 21-vjeçari i atëhershëm u dënua për dy akuza për nxitje të vetëvrasjes së një të mituri dhe gjithashtu pranoi se “nxiti të paktën 16 vajza adoleshente të kryenin vetëvrasje”. Një gjykatë siberiane e dënoi atë me tre vjet burg në korrik 2017.
