Kreu i Grupit Parlamentar të PS-së, Taulant Balla ka reaguar pasi presidenti Ilir Meta ktheu në Kuvend për rishqyrtim ndryshimet në Kodin Zgjedhor.
Sipas Ballës, Presidenti e ka vonuar qëllimisht procedurën parlamentare, por ai shtoi se ka ende kohë për ta kaluar sërish në Parlament.
Gjatë një prononcimi për mediat nga Elbasani, Balla tha gjithashtu se mazhoranca i ka votat për ta kaluar në Kuvend ligjin e ri për Kodin Zgjedhor, pavarësisht çdo vonese që sipas tij vjen nga një president mistrec e hileqar.
“Më vjen keq që presidenti i Republikës mori kohën për të vonuar procedurat parlamentare. Ne nuk kemi asnjë ditë për të humbur. Kodi zgjedhor është një kod i plotë i cili ka transferuar qasjen dhe i ka dhënë një fuqi më të madhe popullit të zgjedhë jo vetëm kryetarin dhe partinë politike që do, por të zgjedhë edhe listën e kandidatëve që do. Çdo vonesë që vjen nga një president mistrec dhe hileqar unë mendoj që i kemi të gjitha mundësitë ta kalojmë. Reforma zgjedhore është sukses. Tani qytetaret nuk do të kenë një votë, por dy vota meqë këtë e donte dhe presidenti”, tha Balla nga Elbasani.
