Një ngjarje tepër e rëndë ka ndodhur mbrëmjen e kësaj të mërkure në Prishtinë, duke tronditur opinionin publik. Raportohet se një grua shtatzënë është vrarë këtë mbrëmje nga burri i saj para ambienteve të jashtme të maternitetit të Prishtinës.
Bëhet me dije se 35 vjeçarja Hamide Magashi ndodhej në javët e fundit të shtatzënisë, ku fatkeqësisht ka humbur jetën së bashku me foshnjën.
“Rreth orës 18:00, kemi pranuar informatën për një trup të pajetë, në oborrin e QKUK-së në Prishtinë. Policia menjëherë ka dalë në vendin e ngjarjes si dhe ekipi mjekësor të cilët kanë konstatuar vdekjen e viktimës, femër, rreth 35 vjeç. Mbështetur në informacionet e para, dyshimet e ngritura sugjerojnë se bëhet fjalë për vrasje.
Aktualisht policia në koordinim me prokurorin e shtetit ka nisur një hetim dhe po vijon ndërmarrjen e të gjitha veprimeve hetimore dhe të ekzaminimit, me qëllim sqarimin e plotë të ngjarjes”, thuhet në njoftimin e policisë.
Ndërkohë autori i ngjarjes makabre, burri i viktimës, raportohet se ka kryer krimin e rëndë me armë zjarri, pasi Policia ka gjetur gëzhonja dhe më pas ai është larguar menjëherë nga vendngjarja.
Trupi i i të ndjerës qëndroi për disa minuta para klinikës gjinekologjike, ndërsa forca të shumta policie mbërritën në vendngjarje.
Krimi i rëndë dhe një kohësisht i dyfishtë ka ngjallur reagime të shumta edhe nga figurat e politikës. Kryeministri Albin Kurti shpreh ngushëllimet për dy jetët e humbura, duke i cilësuar si “dy ëngjëj në qiellin e pistë”
Postimi i Kurtit:
Dy engjëj në qiellin e pistë
Vrasje mizore. U vra edhe një grua. Edhe kjo nga burri i saj. Në oborr të spitalit. Atje ku duhet të shërohen njerëzit. Në oborr të Klinikës Gjinekologjike. Atje ku lindin gratë. U shua një jetë që po sillte edhe një jetë tjetër. Gruaja ishte shtatzënë. Rreth 35 vjeç, as në gjysmë të jetës së saj. E fëmija që ajo donte ta lindte as nuk e filloi jetën.
Vrasës mizor. Edhe një burrë që qëllon mbi gruan që duhej ta mbronte. Edhe një burrë që vret një grua. E cila tash është e jona, e të gjithë neve. Bashkë me foshnjen e palindur të saj. Dy qytetarë të Kosovës më pak, dy shqiptarë më pak, do të jenë duke menduar armiqtë tanë. E papranueshme dhe e padurueshme.
Lexo dhe: Tronditet Prishtina, burri vret gruan shtatzënë para spitalit të QKUK-së
