Këshilli Bashkiak i Vlorës ka zhvilluar punimet këtë të enjte mes debateve, për shkak se të ardhurat e Bashkisë kanë qenë në pikën e tyre më të ulët, vetëm 53%.
Kështu raporton gazetarja vlonjate Jerola Ziaj, e cila thekson se kjo është pika më e ulët e performancës së të ardhurave, me grumbullimin në arkë të vetëm 53% të taksave dhe tarifave vendore.
Siç shihet dhe nga videot që gazetarja ka publikuar, nga punimet e Këshillit Bashkiak, këshilltarët kërkojnë ngritjen e një komisioni për auditimin e veprimtarisë së ndërmarrjes së Ujësjellësit të Vlorës, i cili është në varësi të Bashkisë.
Pjesën më të madhe të mosrealizimit të planit vjetor e zënë borxhet e ujësjellësit të cilat për periudhë 2020-2021 janë 1.3 miliardë lekë të vjetra.
Këshilltarët kanë kërkuar që Shoqëria Rajonale Ujësjellës-Kanalizime Vlorë të mbahet përgjegjëse për shpërdorimin e buxhetit të arkëtuar, që sipas tyre, është përdorur për qëllime të tjera që nuk kanë lidhje me përmirësimin e rrjetit.
Investimet janë realizuar në masën 25%, pavarësisht se ky institucion veç tarifave mujore të shërbimit, mbledh dhe taksat të tjera si ajo e gjelbërimit dhe banesave.
