Në Tiranë nga data 15 deri në 21 Maj do të zhvillohet Java Amerikane, ku do të ketë aktivitete të shumta që do të tregojnë kulturën dhe traditat e SHBA-ve.
Ambasada e SHBA bën me dije se në Tiranë ka mbërritur grupi rrok i Forcave Ajrore të Shteteve të Bashkuara “Touch n’ Go”.
Grupi është takuar edhe me ambasadoren e SHBA në Tiranë, Yuri Kim. Mësohet se grupi do të performojë nesër në Sheshin Skënderbej në orën 19:00, ku hyrja do jetë pa pagesë si dhe në Kalanë e Rozafës në Shkodër të shtunën mbrëma.
“Grupi rrok i Forcave Ajrore të Shteteve të Bashkuara Touch n’ Go ka mbërritur në Tiranë! Ata u takuan dje me Ambasadoren Yuri Kim, e cila i uroi mirëseardhjen në Shqipëri dhe i nxiti të shijonin bukurinë dhe mikpritjen e mahnitshme të vendit. Grupi është i emocionuar dhe gati të interpretojë për të gjithë ju! Mos harroni të na bashkoheni për koncertet e tyre publike pa pagesë në Sheshin Skënderbej nesër, në orën 19:00 dhe në Kalanë e Rozafës në Shkodër të shtunën mbrëma! Dhe na ndiqni në faqet tona për të parë se çfarë po bëjnë këtë javë ndërsa udhëtojnë nëpër Tiranë dhe Shkodër” thuhet në njoftimin e ambasadës.