Është shënuar një incident në një qendër votimi në Fier, ku votohet referendumi për shkarkimin ose jo të Lulzim Bashës.
Luan Baçi në një prononcim për media ka denoncuar incidentin duke thënë se policia bashkiake e Armando Subashit komisionerët dhe materialet e votimit i ka nxjerrë jashtë me dhunë, duke ndërprerë votimin për disa minuta.
“Sapo më njoftojnë për një incident në Cakran të Fierit. Policia bashkiake e Fierit ka vajtur të ndalojë procesin e votimit në ambientet e njësisë vendore ku kishim marrë leje. Komisionerët dhe materialet e votimit janë nxjerrë me dhunë nga policia bashkiake e Armando Subashit. Është turp që “Subashët” merren me këto punë!
Ne i sigurojmë demokratët që votimi do të vazhdojë pasi ne për pak minuta do të gjejmë një ambient diku afër për të vijuar procesin e votimit. Procesi i referendumit filloi normalisht por tani e kanë ndërprerë dhe kanë nxjerrë jashtë gjithë komisionerët dhe materialet e votimit. Me shumë mundësi Subashi ka negociuar me Gaz Bardhin ose Lulzim Bashën pasi nuk kishte si të ndodhte ndryshe për të ndërprerë procesin e votimit”, tha Luan Baçi.
