Kryetari i komunës së Leposaviqit, Lulzim Hetemi është ende i bllokuar në zyrën e tij.
Hetemi ka filluar punën në orën 6:30 të mëngjesit të së hënës dhe është ende në objekt, shkruan Klan Kosova.
Ai është bashkë me vëllain e tij dhe do t’a kalojë natën aty për shkak se situata jashtë vijon të jetë e tensionuar mes protestuesve serbë dhe forcave të KFOR.
Qytetarët serbë kanë vijuar protestën që në orët e para të mëngjesit e më pas një pjese e tyre u shpërnda nga forcat policore.
Situatë e njëjtë u paraqit edhe në komunat e Zubin Potokut dhe Zveçanit.
Tensionet më të mëdha ishin në komunën e Zveçanit ku pas përplasjes së KFOR dhe protestuesve, mbetën të plagosur rreth 25 ushtarë.