Ambasada gjermane në Tiranë ka reaguar për rekomandimin e KE për heqjen e kufizimeve të përkohshme të udhëtimit për qytetarët shqiptarë.
Në një postim në faqen zyrtare në Facebook, ambasada bën me dije se duke filluar nga 20 qershori udhëtimi për në Gjermani i personave rezidentë në Shqipëri lejohet për të gjitha qëllimet e udhëtimit.
Sipas ambasadës, për udhëtimet hyrëse me rrugë ajrore, është e domosdoshme një dëshmi e testit, ose një dokument që provon shërimin apo vaksinimi kundër Covid-19.
“Heqja e kufizimeve të udhëtimeve hyrëse nga Shqipëria në Gjermani”
Qeveria Federale ka hequr të gjitha kufizimet e udhëtimeve hyrëse për personat rezidentë në Shqipëri me efekt që nga dita e dielë, 20 qershor, ora 0:00 CET. Që nga kjo datë, udhëtimi për në Gjermani i personave rezidentë në Shqipëri, lejohet përsëri për të gjitha qëllimet e udhëtimit. Për udhëtimet hyrëse me rrugë ajrore është e domosdoshme një dëshmi e testit, një dokument që provon shërimin apo vaksinimin”, shkruhet në njoftimin e ambasadës gjermane në Tiranë.
