Gjykata e Kukësit ka dhënë masën arrest me burg me afat 3 mujor për gjashtë emigrantet që dy ditë më parë qëlluan me armë zjarri drejt efektivëve në kufirin e gjelbër në Morinë.
Pesë shtetas sirianë dhe një algjerian u arrestuan në fshatin Morinë. Në fshatin Morinë, në kufirin e gjelbër me Kosovën, shërbimet e Policisë kanë lokalizuar grupin e shtetasve të huaj që ushtronte veprimtarinë kriminale të dhënies ndihmë emigrantëve nga vendet e treta, për kalim të paligjshëm të kufirit.
Shërbimet e Policisë iu kanë bërë thirrje këtyre shtetasve që të ndalojnë, por disa prej tyre kanë hapur zjarr në drejtim të efektivëve duke rrezikuar seriozisht jetën e tyre. Menjëherë është komunikuar me Policinë Kufitare të Kosovës, me qëllim bllokimin e kufirit në anën e Kosovës.
Pas disa orësh ndjekje, shërbimet e Policisë kanë bërë të mundur kapjen dhe prangosjen e 6 prej tyre. Gjithashtu, në kuadër të këtij operacioni, u shpall në kërkim shtetasi S. G., 27 vjeç, me shtetësi algjeriane.