Prokuroria Speciale e Kosovës ka njoftuar se janë ndaluar gjashtë persona të dyshuar për sulmin ndaj policisë, ku mbeti i vdekur polici Afrim Bunjaku. Ata do të mbahen të ndaluar për 48 orë. Sipas këtij organi të drejtësisë në Kosovë, gjashtë personat dyshohen për këto vepra penale:
– “Veprat e rënda kundër rendit kushtetues dhe sigurisë së Republikës së Kosovës’’
– ‘’Sulm kundër rendit kushtetues të Republikës së Kosovës’’
– ‘’Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës’’
– ‘’Mbajtja në pronësi, kontroll ose posedim të paautorizuar të armëve’’
Gjithashtu nga aksioni i zhvilluar sot nga njësitë speciale u sekuestruan në cilësitë e provës materiale një sasi e konsiderueshme municioni. Në njoftimin e bërë për mediet të Prokurorisë së Kosovës thuhej:
Komunikata e plotë:
Prishtinë, 24 shtator 2023 – Prokuroria Speciale e Republikës së Kosovës (PSRK), njofton opinionin publik se që nga marrja e informatave të para lidhur me sulmin e ndodhur në mëngjesin e sotëm, në fshatin Banjskë të komunës së Zveçanit, në vendin e ngjarjes ka dalur prokurori i PSRK-së për të mbikëqyrur aksionin e sotëm.
Prokuroria Speciale, gjithashtu njofton se gjatë aksionit të sotëm të Policisë së Kosovës, janë ndaluar gjashtë (6) persona të përfshirë në sulmin ndaj Policisë së Kosovës, për veprat penale “Veprat e rënda kundër rendit kushtetues dhe sigurisë së Republikës së Kosovës’’ nga neni 126 lidhur me ‘’Sulm kundër rendit kushtetues të Republikës së Kosovës’’ nga neni 114, ‘’Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës’’ nga neni 138 lidhur me nenin 129 dhe ‘’Mbajtja në pronësi, kontroll ose posedim të paautorizuar të armëve’’ nga neni 366 paragrafi 1 të KPRK-së.
Po ashtu, nga aksioni i sotëm i Policisë së Kosovës, janë sekuestruar automjete të mbushura me sasi të konsiderueshme të armatimit të llojeve të ndryshme.
Prokuroria Speciale i shpreh ngushëllime familjes së Policit të vrarë, ndërsa policëve të plagosur në këtë aksion iu uron shërim të shpejtë.
PSRK, thekson se hetimet nga vendi i ngjarjes po vazhdojnë në bashkëpunim dhe koordinim me të gjitha institucionet relevante përgjegjëse.
Me aktvendim të Prokurorit të Prokurorisë Speciale të ndaluarit dërgohen në mbajtje për 48 orë.
