Nga SUADA DACI
Më quani si të doni, por unë jam një njeri që mund t’i shohë me dhjetëra apo qindra herë filmat shqiptarë dhe mos të më mërziten. Një ndër filmat e mi të preferuar mbetet “Duaje emrin Tënd” me regji të Kristaq Mitros dhe Ibrahim Muçaj dhe me treshen simpatike të aktorëve Ndriçim Xhepa, Rajmonda Bulku dhe Kristaq Skrami.
Dy të parët i kisha takuar në një mbrëmje poetike në shtëpinë muze “Ismail Kadare” që u organizua një vit më parë, ndërsa për Kristaq Skramin nuk kisha më asnjë kontakt. Më kujtohet që kur kam nisur punën si gazetare në ATSH z.Skrami ishte drejtor i Teatrit Kombëtar. Më duhet ta them (pa i bërë elozhe) ka qenë një nga drejtuesit më të sjellshëm dhe më i hapur me gazetarët, kishim realizuar mini intervista në lidhje me institucionin që drejtonte, por asnjëherë një intervistë të gjatë profil për yllin e kinematografisë shqiptare të viteve ‘80.
Ndaj e kontaktova dhe nuk më tha jo. Kështu që u takuam në një prej kafeve të kryeqytetit dhe Skrami (përveçse elegant dhe në një aleancë të përjetshme me rininë) u shfaq gjithashtu me një arkiv të pasur fotosh nga karriera e tij…
67 vitet që ka mbi shpinë të duket se i ka të gjitha në ekran. Kur shohim figurën e tij në filma, e kujtojmë menjëherë që bëhet fjalë për Kristaq Skramin, djaloshin që bënte vajzat që në atë moshë ta “dëshironin” dhe të kënaqeshin veç kur e shihnin në ekran. Sepse ka një elegancë që nuk i ka humbur as sot. Dhe historinë e jetës e ka ndarë sa në kinematografi, më së shumti në teatër, por mbi të gjitha në menaxhim.
Ndonjëherë na duket se aktorët janë të prirur vetëm tek aktrimi. Por vitet kur Skrami drejtoi teatrin “Petro Marko” në Vlorë dhe Teatrin Kombëtar në Tiranë treguan se ai ishte shumë elegant edhe në menaxhim, duke korrur jo pak suksese.
Artikullin e plotë mund ta lexoni në numrin e nëntëmbëdhjetë të Revistës Newsbomb.al, e cila ka dalë në treg prej datës 20 Mars dhe mund ta gjeni në të gjitha pikat e shitjes…
