Gjykata e Posaçme e Apelit kundër Korrupsionit dhe Krimit të Organizuar (GJKKO), rrëzon kërkesën e disatë të mjekut Edvin Prifti për rikthim në detyrë. Mjeku i arrestuar dhe akuzuar për dy vepra penale ka kërkuar disa herë që të rikthehet në detyrë po kjo kërkesë është rrëzuar, ashtu si sot.
Prokuroria Speciale SPAK, e akuzon mjekun Edvin Prifti për veprat penale “Korrupsioni pasiv i personave që ushtrojnë funksione publike” dhe “Pastrimi i produkteve të veprës penale ose veprimtarisë kriminale”.
Edvin Prifti nuk ndodhet në qeli por me vendim gjykate ai nuk mund të vesh përparsen e mantelbardhit. SPAK disa kohë më parë e dërgoi vendimin në Gjykatën e Lartë duke kërkuar që mjeku të rikthehet prapa hekurave. Në 7 shtator 2021, Gjykata e Lartë nuk pranoi kërkesën e SPAK për kthimin në burg të Edvin Priftit por as nuk e ktheu atë në detyrë.
Dy javë më vonë, mjeku ka bërë përsëri kërkesë për të veshur përparësen e bardhë, por Gjykata e Posaçme e Apelit e ka rrëzuar. Edhe sot, togat e zeza nuk janë bindur nga kërkesa dhe kanë lënë në fuqi vendimin për “Pezullim nga detyra”.