Kryetari i Partisë Demokratike, Lulzim Basha, ka bërë me dije se ka mirëpritur sot delegacionin nga Ukraina, në përbërje të cilit ishin deputetë, ekspertë të çështjeve politike, opinionistë dhe aktivistë.
Përmes një postimi në “Facebook”, Basha tha se gjatë këtij takimi i shprehu atyre mbështetjen e tij dhe të PD-së për udhëheqjen dhe popullin e Ukrainës, të cilët vazhdojnë të përballen me guxim heroik me agresorët rusë.
Kryedemokrati thekson se Federata e Rusisë ka detyrim të kompesojë Ukrainën, qytetarët, sipërmarrjet dhe qeverinë e saj, për dëmet e shkaktuara nga aktet e paligjshme.
“Federata Ruse ka detyrimin për të kompensuar Ukrainën, qytetarët, sipërmarrjet dhe qeverinë e saj, për dëmet e shkaktuara nga aktet e paligjshme të Federatës Ruse, ky është dhe thelbi i rezolutës së propozuar prej meje në Këshillin e Europës dhe që ka një mbështetje të gjerë nga vendet anëtare të kësaj organizate”, shkruan Basha.
Postimi i plotë i Lulzim Bashës:
Kënaqësi të prisja në PD delegacionin nga Ukraina në përbërje të cilit ishin deputetë, ekspertë të çështjeve politike, opinionistë dhe aktivistë.
Ju shpreha atyre mbështetjen time dhe të PD për udhëheqjen dhe popullin e Ukrainës, të cilët vazhdojnë të përballen me guxim heroik me agresorët rusë. Këto janë ditë të errta jo vetë për Ukrainën por dhe për botën demokratike, e cila po përballet me tentativën e tjetërsimit me luftë të tërësisë teritorale të një shteti sovran e të pavarur.
Përgjegjësia për krimet dhe dëmet e shkaktuara në Ukrainë nga agresioni i paprovokuar i Rusisë, është i presidentit të Rusisë, Vladimir Putin, dhe duhet të paguajë për të.
Federata Ruse ka detyrimin për të kompensuar Ukrainën, qytetarët, sipërmarrjet dhe qeverinë e saj, për dëmet e shkaktuara nga aktet e paligjshme të Federatës Ruse, ky është dhe thelbi i rezolutës së propozuar prej meje në Këshillin e Europës dhe që ka një mbështetje të gjerë nga vendet anëtare të kësaj organizate.
