Prokuroria e Posaçme (SPAK) ka marrë në dorë çështjen e atentatit te Milotit, ku mbeti i vrarë Klisman Preci dhe u plagos shoku i tij Ylli Brahimi.
Sipas Prokurorisë së Kurbini ky ishte një atentat i kryer nga një grup kriminal. Gazetarja Klodiana Lala bëri me dije se dosja është tërhequr një javë më parë dhe veprimet po kryhen nga Prokurori i SPAK, Altin Dumani.
Tashmë SPAK po heton të gjithë kundërshtarët e Ylli Brahimit që besohet se ishte shënjestër e atentatit.
Kujtojmë se Brahimi, mik i Ervis Martinajt, po udhëtonte me një makinë të blinduar, ndërsa ra pre e atentatit, por fatmirësisht arriti t’i mbijetonte plumbave, ndërsa Preçi ndërroi jetë për shkak të plagëve të rënda. Në vitin 2021, Ylli Brahimi i mbijetoi një atentati në qendër të Milotit.
Ngjarja e rëndë ndodhi vetëm pak ditë pas atentatit të trefishtë në mbikalimin e Fushë Krujës, ku mes viktimave ishte edhe kushëriri i Ervis Martinajt, Brilant Martinaj.