Kreu i diplomacisë evropiane, Josep Borell ka njoftuar se është arritur marrëveshje për çtensionimin e situatës mes Kosovës dhe Serbisë.
“Kemi marrëveshje”, shkruan Borrell në Twitter.
Sipas Borrell, palët kanë rënë dakord, përkatësisht që Kosova të ndërpresë veprimet e mëtejshme në lidhje me riregjistrimin e automjeteve dhe Serbia të mos lëshojë më targa ilegale me emrat e qyteteve të Kosovës.
“Me kënaqësi të njoftoj se kryenegociatorët e Kosovës dhe Serbisë nën lehtësimin e BE-së kanë rënë dakord për masat për të shmangur përshkallëzimin e mëtejshëm dhe për t’u përqëndruar plotësisht në propozimin për normalizimin e marrëdhënieve të tyre.
Serbia do të ndalojë lëshimin e targave me emërtimet e qyteteve të Kosovës dhe Kosova do të ndërpresë veprimet e mëtejshme në lidhje me riregjistrimin e automjeteve.
Unë do t’i ftoj palët në ditët në vijim për të diskutuar hapat e ardhshëm. E falënderoj EUSR-në, Miroslav Lajcak dhe palët për punën e palodhur”, shkruan Borrell.