Politikani shqiptar i Maqedonisë së Veriut, Ali Ahmeti ka vizituar sot prindërit e ish-presidentit Hashim Thaçi në Kosovë. I shoqëruar nga zv/kryeministri Artan Grupi, Ahmeti është takuar me prindërit dhe të afërmit e Thaçit.
“Vizitova sot vatrën familjare të bashkëveprimtarit tim dhe ish presidentit të Republikës së Kosovës, Hashim Thaçi, për t’ju dhënë zemër e forcë prindërve dhe të afërmve të tij në betejën e drejtësisë, ku djali i tyre me shokë po mbron dinjitetin e UÇK-së, kauzën e pastër të mbarë popullit të Kosovës.
Drejtësia vonon, por nuk harron, kështu i thashë Bacit Haxhi kur po kuvendonim mbi vitet e qëndresës kombëtare për lirinë dhe shtetësinë e Kosovës. Krenarë do ta presim bashkë Hashimin me shokë në rikthimin e tij si fitues i drejtësisë! Liria ka emër”, shkruan Ali Ahmeti.
Pak ditë më parë, në Kosovë ishte dhe vetë Hashim Thaçi, pasi nëna e tij nuk është në gjendje të mirë shëndetësore dhe autoritetet e paraburgimit në Hagë i dhanë leje. Ish-presidenti qëndroi disa orë me familjen e tij në Kosovë dhe u rikthye në qeli, në Holandë.
Kujtojmë se, katër ish-krerët e UÇK-së ndodhen në Hagë, pasi akuzohen për krime lufte dhe krime kundër njerëzimit. Në paraburgim janë ish-presidenti Hashim Thaçi, ish-kreyparlamentarët Kadri Veseli e Jakup Krasniqi, si dhe shefi i Grupit Parlamentar të Lëvizjes Vetëvendosje (LVV), Rexhep Selimi.