Gjykata e Posaçme kundër Korrupsionit dhe Krimit të Organizuar ka pranuar kërkesën e ish-ministrit të Mjedisit Lefter Koka, ish-sekretarit të kësaj ministrie Alqi Bllako dhe 14 të pandehurve të tjerë për inceneratorin e Fierit, që procesi ndaj tyre të vijojë me gjykim të shkurtuar.
Ndërkohë, për tre të pandehurit e tjerë, ku një prej tyre është edhe Etleva Kondi, procesi do të vijojë me gjykim të zakonshëm dhe çështja u veçua.
Pranimi i gjykimit të shkurtuar nuk do të thotë detyrimisht se të akuzuarit kanë pranuar fajësinë, por u jep mundësinë që në rast se shpallen fajtorë në fund të të gjithë procesit gjyqësor, ata përfitojnë uljen e 1/3 të dënimit.
Ata do përballen me akuzat e “Shpërdorimit të detyrës”, “Korrupsioni aktiv i funksionarëve të lartë shtetërorë ose i të zgjedhurve vendorë”, “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale apo i veprimtarisë kriminale”.
Lefter Koka është shprehur në disa seanca se akuzat ndaj tij janë të paprovuara, duke pretenduar se procesi është i montuar me qëllim që ai të goditet politikisht. Edhe ish-deputeti Alqi Bllako deklaroi se nuk ka pasur asnjë rol në dhënien e koncesionit.