Drejtori i Policisë së Shtetit Muhamet Rrumbullaku, është shprehur këtë të shtunë se institucioni që ai drejton është “në rrugë të mbarë” në hetimet që po kryen për fatin e biznesmenit të basteve Ervis Martinaj. Prej 9 gushtit, nuk ka asnjë gjurmë të tij.
I pyetur nga gazetarët teksa fliste për perimetrin e sigurisë së Samitit të BE, Rrumbullaku u përgjigj duke thënë se pas porosisë së kryeministrit Edi Rama, strukturat e hetimit në Policinë e Shtetit janë në rrugën e duhur.
“Do përgjigjem shkurt në respekt të profesionit që mbani gjithsecili prej jush. Absolutisht Policia e Shtetit është në rrugë të mbarë për hetimin e rastit, të cilit ju i referoheni. Zoti Kryeministër, ka kërkuar nga Policia e Shtetit zgjidhjen e rastit, për të cilin ne mendojmë dhe gjykojmë se jemi në rrugën e duhur”, tha ai.
Megjithatë, numri një i Policisë së Shtetit nuk dha ndonjë datë apo shenjë se së shpejti do të ketë një deklaratë për zhdukjen e biznesmenit të basteve dhe të shumëkërkuarit të SPAK, Ervis Martinaj.
